Alle pasientar har rett til vern mot spreiing av opplysningar om personlege og helsemessige forhold. Det gjeld også personar som er utsett for ulukker eller valdshandlingar som blir omtalt i media. Sjukehuset gir derfor ikkje ut opplysningar om helsetilstanden til enkeltpasientar, sjølv om hendinga som førte til sjukehusinnlegging er av offentleg interesse. Vi har stor forståing for media si rolle og behov for å informere befolkninga i saker av offentleg interesse, men ivaretaking av teieplikt og personvern går framfor media sitt informasjonsbehov. Ifølge dei regionale personvernomboda i Helse Vest bør opplysningar om pasienttilstand handterast som personopplysningar omfatta av personvernforordninga og lovfesta teieplikt.
På ulukkesstaden har politiet ansvar for å gi informasjon til media. Sjukehusa tar jamleg i mot pasientar i saker der politiet er involvert. I desse sakene er media si interesse ofte stor. Politiet gjer eigne vurderingar av kva informasjon dei kan og ønskjer å dele med media i slike saker. Helsepersonell har teieplikt også overfor politiet, med nokre få unntak. Politiet får derfor berre opplysningar om pasient frå sjukehuset der det er heimel i lov for å gi slik informasjon.
Informasjon frå sjukehuset ved større hendingar
Ved større ulukker med mange skadde, terrorhendingar, naturkatastrofar og liknande vil kriseleiinga ved sjukehuset samarbeide med politiet om kva informasjon ein kan gi til media. Det vil vere naturleg at ein for eksempel kan gi informasjon som kor mange skadde det er og kva type skader det generelt sett blir gitt behandling for avhengig av hendinga. Tilstand på enkeltpasientar vil av omsyn til personvernet ikkje bli gitt.
