Pasientane ønskjer å ta større del i eiga utgreiing og behandling og sjukehuset vil legge til rette for god dialog med pasientar og pårørande. Pasientinformasjon må vere ein del av behandlinga, og vi vil sikre at samanhengande og lik informasjon er lett tilgjengeleg for pasientar og pårørande. Pasientar som har kunnskap om eigen tilstand er betre i stand til å medverke i behandlingsval og meistre ein kvardag med sjukdom og skade. Dette gjeld alle pasientgrupper, men kanskje særleg pasientar med langvarig sjukdom (kronikarar).
Vi må ta vår del av jobben med førebygging av sjukdom og skade. Det betyr å hindre at sjukdom utviklar seg, førebygge tilbakefall av sjukdom og bidra til at pasientane kan leve best mogleg med sjukdom og skade.
Å legge til rette for at kliniske ernæringsfysiologar, kliniske farmasøytar, fysioterapeutar og logopedar mv. deltar meir i pasientbehandlinga, vil gi pasientane betre kunnskap og fleire verktøy for å ta vare på si eiga helse. Læring og meistring som inkluderer kunnskap om tilpassa ernæring og fysisk aktivitet, blir viktig for å lukkast med å førebygge og dempe behovet for helsetenester framover. For å få til dette vil vi samarbeide med kommunehelsetenesta, men også med skule, arbeidsliv og idrettsorganisasjonar.
