Til deg som ventar heime før operasjon ved ortopedisk avdeling

Avbod/endring av operasjonstidspunkt

Om du blir forhindra frå å komme til det avtalte tidspunktet eller om du blir sjuk (feber, naseforkjølt, halsvonde/hoste etc.) ber vi deg kontakte oss.

Slik førebur du deg heime før operasjonen

På operasjonsdagen kan du ta dei vanlege medisinane dine bortsett frå om du bruker medisinar mot diabetes, det vi kallar Ace-hemmar, A2-blokkere og vassdrivande. Desse medisinane skal du IKKJE ta. Om du er usikker på om nokon av dei medisinane du bruker tilhøyrer nokre av desse medikamentgruppene så la vere å ta medisinane. Ta dei heller med deg til sjukehuset, så tar du dei rette medisinane i samråd med oss.

Du kan ete og drikke som vanleg fram til midnatt. Etter midnatt skal du ikkje ete meir, men du kan røyke, snuse og drikke vatn, saft, jus, brus, te og svart kaffi fram til 1 time før oppmøtetidspunktet ditt.

Ta på deg tøy som er lett å få av og på etter at du er operert, og skotøy som er stødig og enkelt å få av og på.

Når du kjem til sjukehuset vil du få snakke med ein sjukepleiar og få utlevert sjukehustøy som du skal ta på deg. Sidan det kan bli litt ventetid denne dagen anbefaler vi at du tar med deg lesestoff, musikk eller anna underhaldning.

• Om du skal opererast ved innlegging på sjukehuset: Ei stund før du skal opererast vil du ofte bli køyrd til eit mottaksareal og der blir du liggande fram til operasjonsstua er klar. I mottaksarealet vil du få lagt inn ein venekanyle og om du skal opererast i blokade vil også denne leggast der.

• Om du skal opererast dagkirurgisk ventar du i same område som du blir køyrd tilbake til etter inngrepet.

Korleis går ein blokade-bedøving føre seg?

Blokade er ei lokalbedøving som bedøver heile armen din eller nedste del av foten din (avhengig av kva du skal opererast for). Denne blokaden held armen/foten kjenslelaus og smertefri i 10–16 timar (for nokon opptil 24 timar). Du vil i denne perioden ikkje kunne bruke armen/foten din som normalt.

Det er ein anestesilege som legg blokaden. Du blir ultralydskanna i området der blokaden skal leggast. Om du har ein handleddsskade kan det vere i armhola eller like over kragebeinet og dersom det er i foten du har skadd deg så kan det vere i knehasen og framfor på låret.

Ultralyd blir brukt for at anestesilegen skal vite presis kor lokalbedøvinga skal leggast. Det blir gjort med ei tynn nål like under huda. Før operasjonen startar, vil anestesipersonalet sjekke at bedøvinga sit korrekt slik at du ikkje skal kjenne smerter undervegs. Nokon vil merke trykk og berøring og det er heilt normalt.

Under operasjonen kan du få lytte til musikk (ta gjerne med deg din eigen mobil og høyretelefonar/pods). Nokre pasientar ønsker å sove undervegs. Dette blir avtalt med anestesilegen individuelt.

Ein del inngrep blir gjorde i full narkose som alternativ til blokade. Narkosen blir sett i ein venekanyle som blir lagd på armen. Anestesilegen bedømmer kva anestesiform som er best for deg.

Korleis går narkose føre seg?

Ein del inngrep blir gjorde i full narkose som alternativ til blokade. Narkosemidla blir sette i ein veneflon (venekanyle) som blir lagde på armen. Narkosen blir starta etter at du er køyrd inn på operasjonsstua og har fått kopla på deg overvaking (EKG, blodtrykk og ei klype på fingeren for å måle at du pustar godt). Etter at operasjonen er ferdig, blir du vekt inne på operasjonsstua og køyrd til postoperativ avdeling. Der vil vi ha deg i minst éin time, gjerne meir, til vi ser at du har det bra.

Anestesilegen bedømmer kva anestesiform som er best for deg.  

Om du har sove under operasjonen blir du køyrd til postoperativ avdeling eller tilbake til venteområdet på dagkirurgisk avdeling. Der ligg du til du er heilt vaken. Deretter blir du eventuelt køyrd opp igjen til ortopedisk sengepost der du får kle deg om til dine eigne klede. Før du reiser heim får du all nødvendig informasjon om korleis du skal starte dei smertestillande medisinane dine. Vi anbefaler at du har ein vaksen pårørande hos deg den første dagen/natta.

Kirurgen informerer deg om korleis operasjonen har gått og kva som er planen vidare.

Det er viktig at du klarer å late vatnet i løpet av kvelden den dagen du blir operert.

Om du ikkje har klart å tisse 6–8 timar etter at du reiste frå sjukehuset, må du kontakte oss.

Kva skal eg gjere så lenge blokaden verkar?

Så lenge armen/foten din blir opplevd nomen er det viktig at du passar på enkelte ting:

1. Ikkje plassar varme/kalde gjenstandar direkte på det bedøvde området.
2. Ikkje la armen/foten ligge på hardt underlag. Legg pute/dyne under.
3. Dersom du har operert handa/armen din vil du bli skriven ut med ein fatle som du skal bruke i alle fall så lenge blokaden verkar, men ofte lenger. Det vil ortopeden i tilfelle informere deg om.
4. Dersom du har fått laga til gips etter operasjonen bør du sjekke fingerneglene dine så lenge blokaden verkar og gi beskjed til ortoped om du ser fargeendring.
5. Dersom du er operert i foten vil du vanlegvis ikkje kunne belaste foten/gå på den så lenge blokaden verkar. Ikkje forsøk å gå utan å ha nokon til å hjelpe deg første gongen.
6. Om du har fått armbedøving kan balansen vere endra så ver varsam med trappegang så lenge armen er nomen.

Smertestillande behandling

Dei fleste vil trenge smertestillande tablettar etter at blokaden har slutta å verke. Du vil få skriftleg informasjon om kva tablettar du skal ta etter operasjonen og når du skal ta dei. Det er svært viktig at du følger våre oppfordringar og spesielt viktig at du tar smertestillande allereie før blokaden har slutta å verke. Dette er for å få ein overlappande effekt.

Dersom blokaden framleis verkar når du skal gå og legge deg om kvelden skal du uansett ta dei anbefalte smertestillande tablettane for å unngå at du vaknar midt på natta med sterke smerter.