Vidare opptrening
Vanlegvis må du vere innlagt på sjukehus i 3-7 dagar etter operasjonen. På sjukehuset vil du få nødvendig støtte og rettleiing til å komme i gang med aktivitet.
Du kan trene i ryggleie, sittande på sengekant eller stol, og etterkvart også i ståande stilling. Du vil trene på nyttige teknikkar for å klare deg i det daglege, og trene på å gå med egna ganghjelpemiddel. Hugs at det er mykje god trening i daglege aktivitetar: Som å reise og sette seg, sitte oppe i stol til måltid, toalettbesøk, personleg hygiene og korte turar.
Du vil få instruksjon i øvingar som du bør fortsette med etter sjukehusopphaldet. Målet er at du kjem godt i gang og blir så sjølvhjulpen som mogleg. Unngå å bli sittande heile dagen, men prøv gradvis å komme i gang med korte turar. Dersom det ikkje er mogleg for deg å gå, er det viktig med dagleg ståtrening i samband med daglege aktivitetar.
Mange har behov for rehabilitering etter opphaldet. Vi vil snakke med deg og dine pårørande for å kartlegge dine behov etter operasjonen. Vi kontaktar kommunen og melder frå om at du er innlagt. Kommunen vil avgjere om du får tilbod om tilrettelegging i heimen og heimesjukepleie, eller rehabiliteringsopphald.
Utreise
Det er oftast nødvendig å reise til eit korttidsopphald på sjukeheim etter innleggelsen på sjukehuset. Der kan du få hjelp til å kome deg til hektene igjen og vere trygg når du skal trene på å gå igjen.
Det blir sendt ein samanfatning av behandlinga du har fått (epikrise) til fastlegen din.
Du får med resept på smertestillande og eventuelt andre nye medisinar dersom du treng det etter utskriving frå sjukehus. Stinga skal vanlegvis fjernast etter 14 dagar. Det kan du få gjort hos fastlegen eller ein annan lege.
Etter 3 månader blir du kalla inn til kontroll hos fysioterapeut på vår poliklinikk.
Informasjon frå fysioterapeut
Øvingar i seng
- Strekk og bøy i ankelleddet

- Ligg på ryggen. Bøy det eine beinet. Støtt hælen mot underlaget heile tida.

- Hald beinet i bøy nokre sekund, og strekk ut beinet igjen.
Øvingar i ståande
- Stå med føtene litt frå kvarandre.
- Støtt deg til bord eller stolrygg.
- Bøy knea, men ikkje bøy der lenger ned enn at du kjenner du har kontroll.

- Stå med føtene litt frå kvarandre.
- Støtt deg til bord eller stolrygg.
- Strekk deg opp og på tå. Pass på at du er strak i hofta.

- Stå med føtene litt frå kvarandre.
- Støtt deg til bord eller stolrygg.
- La tå på operert bein gli skrått bakover langs golvet med bøygd kne.

- Strekk hofte og kne.
- La beinet gli sakte tilbake til utgangspunktet.
- Tå på operert bein skal vere i golvet heile tida.
Slik går du med krykker
- Før begge krykkene framover og set operert fot mellom krykkene.
- Legg tyngda på krykkene slik at du klarer å løfte den uopererte foten.

- Før den uopererte foten framfor den opererte og legg tyngda på den.
- Før på nytt begge krykker framover og set operert fot mellom krykkene.
