Ved innlegging ved AFMR, Rehabiliteringsklinikken Nordås, gjennomfører fysioterapeuten ei grundig undersøking og kartlegging. Fysioterapeuten undersøker mellom anna aktivitetar i dagleglivet, forflytning, balanse, rørslekontroll, lammelsar, kjenslesans, merksemd, smerter, behov for hjelpemidlar og ortoser.
Saman med pasient, pårørande og det tverrfaglege teamet blir det sett opp rehabiliteringsplan med konkrete målsetjingar i eit eige målmøte. Rehabiliteringsmåla blir fortløpande evaluert og justert under opphaldet.
Under opphaldet er det stort sett daglege behandlingstimar med fysioterapeut (vekedagane). Her er også tilbod om bassengtrening i terapibasseng for aktuelle pasientar. På avdelinga har ein tilgang til rehabiliteringsteknologi som tredemølle med oppheng, LiteGait (oppheng til bruk ved gange på golvet), Erigo (dynamisk ståbord) og Motomed (arm/bensykkel) som vert nytta som eit supplement til behandlinga. I tillegg blir treninga gjennom døgnet ivaretatt av det tverrfaglege personalet med til dømes tiltak som ståbord, eigentrening, forflytningstrening og gangtrening.
Mål under behandlinga kan vera:
- Auka sjølvstende i forflytning
- Trygg gangfunksjon
- Gjenvinna balanse i kroppen
- Auka styrke og rørslekontroll i den råka kroppshalvdelen
- Auka merksemd for råka kroppshalvdel
- Vurdera behov for aktuelle hjelpemidlar og ortoser
Mot slutten av opphaldet blir det tatt stilling til om/eventuelt kvar vidare rehabilitering skal skje, og det blir oppretta kontakt med neste instans for å sikre ei god overføring til primærhelsetenesta.