Habilitering – autismespekterforstyrringar hos vaksne

For å kunne avklare ein diagnose innanfor autismespekteret må vurderinga bygge på ei grundig utgreiing.

Både pasient og nærpersonar som kjenner pasienten godt deltar i utgreiingsarbeidet, når dette er mogleg. Utgreiinga består av intervju og bruk av ulike kartleggingsskjema.

Når kartlegginga er ferdig, vil habiliteringstenesta anbefale ulike tiltak for pasient, pårørande og eventuelt det kommunale hjelpeapparatet og andre som hjelper pasienten. Aktuelle tiltak vil vere råd og rettleiing om tilrettelegging av omgivnadene dine, strukturering av samhandling og kommunikasjon.

For deg som får diagnosen innanfor autismespekteret vil informasjon og opplæring i autismespekterforstyrringa vere ein del av behandlinga. Undervisninga kan vere individuell eller gå føre seg i grupper.

Vi kallar deg og eventuelle nære personar inn til eit møte. Der vil vi gå gjennom resultatet av kartlegginga og legge fram dei tiltaka som vi anbefaler.

Vi kan tilby rettleiing/rådgiving til pårørande, tilsette i kommunehelsetenesta, bustadpersonell, NAV, skole, arbeidsplass og liknande.

I nokre tilfelle er det er det aktuelt å samarbeide med og/eller tilvise tilleggsproblematikk til andre avdelingar i spesialisthelsetenesta.

Informasjon om resultatet frå utgreiinga og aktuelle tiltak blir samanfatta i ein rapport. Rapporten blir sendt til tilviser og andre som du eller verje samtykker til at den skal sendast til.

Mange med diagnose innanfor autismespekteret har behov for samansette tenester og rett til ein individuell plan (IP). IP beskriv mål og satsingsområde for hjelp, støtte og tiltak som skal bidra til betra funksjon og livskvalitet. IP skal også klargjere ansvarsforhold. Om du ikkje allereie har IP, har spesialisthelsetenesta ansvar for å initiere det og bidra saman med kommunal koordinator slik at du blir sikra tenester frå nødvendige instansar.