Det er vanleg at det blir gitt ein roande medisin i forbindelse med undersøkinga. I så fall bør du ikkje køyre bil før det har gått 24 timar. Du må derfor sørge for transport heim etter undersøkinga.
Faste
Før prosedyren må du faste. Det betyr at du ikkje kan ete, drikke, tygge tyggegummi/drops, snuse eller røyke. Magesekken må vere tom for at ikkje mat eller væske skal komme over i lungene under prosedyren. Det er viktig at du følger instruksjonane om korleis du skal komme godt forberedt til sjukehuset. Dersom du ikkje følger reglar om faste og røyking, kan du risikere at vi må utsette prosedyren.
Du skal ikkje ete fast føde eller drikke mjølk i 6 timar før operasjonen. Du kan gjerne drikke klare væsker (vatn, saft, juice utan fruktkjøtt, brus, te, kaffi utan mjølk/fløte) inntil 2 timar før planlagt operasjon. Unngå røyk, snus, tyggegummi og sukkertøy i 2 timar før operasjonen. Inntil 1 time før operasjonen kan du svelge medisinar med eit glas vatn (maks 150 ml). Ved spesielle inngrep kan det vere andre rutinar som gjeld. Dette blir du orientert om på sjukehuset.
Medisinbruk før undersøkinga
Bruker du Plavix, Clopidogrel, Brilique, Pradaxa, Xarelto, Eliquis, Fragmin eller Marevan, må du stoppe å ta desse medisinane for å redusere risikoen for bløding i forbindelse med undersøkinga. Snakk med fastlegen din om du kan stoppe midlertidig med desse medisinane.
Meir om blodfortynnande
Plavix, Clopidogrel og Brilique kan du ta inntil 5 dagar før undersøkinga.
- Asasantin kan du ta inntil 3 dagar før undersøkinga.
- Pradaxa, Xarelto og Eliquis kan du ta inntil 48 timar før undersøkinga.
- Marevan kan du ta inntil 48 timar før undersøkinga. Bruker du Marevan, må du møte for blodprøvekontroll minst 2 timar før avtalt time.
- Bruker du Albyl-E, kan du fortsette med å ta den.
- Fragmin-sprøyter kan du ta inntil kvelden før undersøkinga.
Andre forhold
Har du diabetes og bruker insulin, kan du kontakte oss for å få timeavtale tidleg på dagen. Tar du livsviktige medisinar som ikkje kan bli utsett, kan du kontakte oss for å få ei tidleg timeavtale. Ta med deg medisinane, så du kan ta dei etter undersøkinga. Vi ønsker at du tar med deg ei oppdatert liste over medisinar du bruker. Gi oss beskjed dersom du er allergisk mot nokre medikament.
Kunstig hjarteklaff
Ta kontakt med avdelinga dersom du har kunstig hjarteklaff.