WESTCOR POC

Kring ti prosent av alle pasientar i akuttmottak blir lagt inn på grunn av brystsmerter og spørsmål om akuttkoronarsyndrom (AKS). Av desse er det berre ein av fire som har akutt koronarsyndrom.  

Når ein pasient kjem til sjukehus med brystsmerter og mistanke om AKS tar ein i tillegg til andre undersøkingar blodprøver for å sjå etter teikn på hjarteinfarkt. Den viktigaste blodprøvemarkøren for akutt hjarteinfarkt kallast troponin, og blir målt ved innkomst og på ny etter 3 timar.  

Svar på blodprøvene kjem som regel først etter 60-90 minutt, noko som betyr at dei fleste av pasientane vert lagt inn på sjukehus for å vente på blodprøvesvar.​

​I WESTCOR POC-studien skal ein teste ut om det er mogleg å bruke ein pasientnær hurtigprøve for å måle troponin (blodprøvemarkøren for akutt hjarteinfarkt). Med hurtigprøva vil ein få svar innan nokre få minutt.  

Ny prøve kan då tas allereie etter 1 time, noko som i tidlegare studiar er vurdert som like trygt og effektivt som ved dagens praksis.  

Studien skal undersøkje om bruk av den nye metoden for blodprøvetaking kan gje raskare avklaring i akuttmottak, om den kan påverke liggjetid, pasienten si oppleving av sjukehusopphaldet, og om det er meir kostnadseffektivt.  

Prosjektleiar 

Kristin M. Aakre, førsteamanuensis UiB, overlege avdeling for medisinsk biokjemi og farmakologi, Haukeland Universitetssjukehus 

​ 

Studien er finansiert av forskingsmidlar frå Helse Vest.  

Alle pasientar som kjem inn i akuttmottak ved Haukeland Universitetssjukehus med brystsmerter og spørsmål om akutt koronarsyndrom kan bli spurt om dei ønskjer å bli inkludert i studien.  

Ved samtykke blir pasienten ved hjelp av loddtrekning plassert i ei gruppe kor ein tar blodprøve med hurtigtest, eller i ei kontrollgruppe kor ein tar blodprøver på vanlig måte.  

Ein vil registrere opplysingar som tid i akuttmottaket, total tid i sjukehuset og endeleg diagnose.