Urtehagen

– Å oppleve eit grønt, naturleg miljø dempar kroppens stressmekanismar, bidrar til å senkje blodtrykk og gir mindre muskelspenningar, seier Linnea Leikvoll som er medisinstudent og leiar for Klima=Helse.

– Dette har blitt vist i fleire vitenskaplege studiar. For alle som har vandra i ein hage, park eller naturområde er det neppe overraskande.

Ein frodig hage byr på ei mengde sanseinntrykk og innbyr til roleg og avslappande rørsle, noko som er viktig i all form for rehabilitering.

Med urtehagen ønskjer dei å oppmuntre menneske til å røre på seg, og inspirere folk til å ete meir grønt. Noko som i tillegg til dei direkte helsegevinstane, også verkar førebyggjande på livsstilsjukdommer som hjarte- og karsjukdommar, diabetes og mange ulike former for kreft. I ein slik samanheng er det å ha ein «spiseleg hage» tilknytt sjukehuset heilt naturleg, meiner Leikvoll.

Godt for kropp og sjel

Å leggje om til ein sunnare livsstil kan også vere meir klimavennleg, noko som er gunstig både for individets helse - og for framtidige generasjonar over heile kloden.

– Vi trur at Urtehagen på Haukeland er eit bidrag, som saman med andre «positive omstillingsprosjekt», kan få store ringverknadar i samfunnet, meiner Leikvoll.

Urtehagen skal også vere ein «sansehage» med lukter, smakar og synsinntrykk. Han skal vere ei kjelde til avkopling frå sjukehuslivet, ein plass kor ein kan lade batteria.

I tillegg vonar eldsjelane at urtehagen også kan vere til inspirasjon for besøkande. Det er ikkje nødvendig å ha ein stor hage for å få til sin eigen kjøkken- eller urtehage. Ein kjem langt med eit par pallekarmar eller nokon store krukker.

– Vi ønskjer deg som pasient, pårørande, student, tilsett eller nysgjerrig besøkande hjarteleg velkommen til å smake deg fram blant bær, krydder, urter og grønsaker. Vi møtest i Urtehagen! 

Sjå fleire bilder frå Urtehagen her: