Pris til forsking på blodkreft
Torsdag delte Helse Vest ut prisar for framifrå forsking og innovasjon. Forskingsprisen gjekk til Bjørn Tore Gjertsen, overlege ved Haukeland universitetssjukehus og professor ved Institutt for Klinisk medisin ved universitetet i Bergen. Gjertsen fekk prisen for den viktige forskinga si på blodkreft, spesielt akutt myeloid leukemi (AML).
Foto: Jorunn Busk, Helse Vest RHF
Gjertsen sitt arbeid har ført til betre behandling av AML-pasientar gjennom avanserte analysar av enkeltceller og signalvegar. Dette har forbetra både diagnostikk og behandling.
– Han har klart å kombinere grunnforsking med praktisk behandling. Arbeidet hans har forbetra behandlinga for pasientar med akutt myeloid leukemi og har vært banebrytande, seier professor Inger Thune, som er leiar for priskomiteen for forskingsprisen og prisen for ung forskar.
Gjertsen har også bygd opp eit sterkt forskingsmiljø og eit breitt samarbeid mellom grunnforskarar og klinikarar. Dette samarbeidet har vore viktig for framstega innan leukemibehandling.
Her kan du lese heile grunngjevinga frå priskomiteen:
Myelogen leukemi (AML og CML) er sentralt i Bjørn Tore Gjertsen si forsking. Han har vist i forskinga si at avanserte enkeltcelleanalyser med hovudvekt på fosfoproteinanalyser i signalvegar at desse proteina er sentrale i vekst av tumor og kan påvisast. Identifisering av desse proteina kan derfor gi informasjon både i diagnostikk og i målretta kreftbehandling. Forskingsarbeidet hans omfattar også ny unik kunnskap.
Bjørn Tore Gjertsen har vore leiande i arbeidet med oppbygginga av eit framifrå forsking-miljø og eit stort tverrfagleg forskingsnettverk kor samarbeid mellom basalforskarar og klinisk behandlingsforsking innnfor leukemi behandlinga har vore sentralt. Hans forsking over lang tid har resultert i nye analyse-metodar og anskaffelse av moderne instrument med stor nytteverdi for leukemi-pasientar. Dette arbeidet er framifrå og har på fleire område vore banebrytande i både nasjonal og internasjonal samanheng.
Forskingsmiljøet Bjørn Tore Gjertsen har leia og leier har stor nytteverdi for tenestetilbodet til leukemipasientar ved hematologisk avdeling på Haukeland universitetssjukehus og til leukemipasientar i helseregionen, nasjonalt og internasjonalt. Hans forskingsresultat har hatt stor betydning for diagnostikk og meir målretta behandling av AML-pasientar. Bjørn Tore Gjertsen har vore ein pioner innanfor AML-forskinga, og hans forsking har resultert i ein forskjell for AML- pasientar si livslengde.
Dei andre prisane, prisen for ung forskar og innovasjonsprisen, gjekk til initiativ som har gitt ny kunnskap om demens og styrkt helsetenester for barn og unge. Initiativ som har hatt mykje å seie for pasientbehandling og helsearbeid i regionen.
Les meir om prisutdelinga hos Helse Vest:
Feira framsteg innan blodkreft, demensforsking og barnehelse - Helse Vest RHF