No kan kreftpasientar få CAR-T-behandling i Bergen
Kreftklinikken ved Haukeland universitetssjukehus er godkjent for å gjennomføre CAR-T behandling, som blir kalla neste generasjons immunterapibehandling.
Det vil seie at neste pasient i Helse vest med lymfomresidiv og som er aktuell for CAR-T, kan bli behandla i Bergen. Fram til no har denne behandlinga berre vore tilgjengeleg på Oslo universitetssjukehus. Denne veka markerte Kreftklinikken det nye behandlingstilbodet.
- Det er mange store ting som skjer i klinikken vår for tida, og dette er ein av dei, sa ein stolt klinikkdirektør Oddbjørn Straume til dei frammøtte.
- Dette er høgteknologi som er på nivå med protonsatsinga vår- men her snakkar vi om bitte små superceller.
Enkelt forklart betyr CAR T-celleterapi at ein type immuncelle, T-celle, blir omprogrammert til å gå til angrep på og drepe kreftceller.
- Teknologien kjem til å bre om seg, her snakkar vi både om langtidsoverleving og kurasjon, sa Straume.
Han takka sine eigne medarbeidarar, med overlege Renate Berget Galleberg i spissen, for godt arbeid. Galleberg kvitterte med å dele takken med mange fleire, både i eigen klinikk og hos Avdeling for immunologi og transfusjonsmedisin (AIT).
- Dette hadde ikkje vore mogleg utan eit veldig godt samarbeid, understreka ho.
Det var i styremøte i Helse Vest i august det vart vedtatt at Haukeland universitetssjukehus skulle få regionalt ansvar for å behandle pasientar på Vestlandet med CAR-T.
– Dette betyr at alvorleg sjuke pasientar kan få behandlinga nærare heimstaden sin, sa Straume då.
– Behandlinga er innført for tre ulike indikasjonar i Noreg no, men det vil truleg kome fleire, fortalde Gunnar Mellgren, direktør ved Laboratorieklinikken, HUS.
Her kan du lese meir:
Kreftpasientar kan få CAR-T-behandling i Bergen i 2025 - Helse Bergen HF
FAKTA
- Haukeland universitetssjukehus har fått regionalt ansvar for å behandle pasientar på Vestlandet med CAR-T frå første halvår 2025.
- CAR T-celleterapi blir kalla neste generasjons immunterapibehandling.
- Immunterapi aktiverer pasienten sitt eige immunforsvar, noko som bidreg til at immunsystemet klarer å identifisere og angripe kreftceller. Dette fører til at veksten av kreftcellene blir bremsa eller stoppar opp.
- I CAR-T-behandlinga blir pasienten sine eigne kvite blodceller hausta og genmodifiserte.
- Dei siste ti åra har denne behandlinga gått frå å vere lovande til å bli etablert behandling for pasientar med leukemi og lymfekreft.