Radiologisk avdeling, Intervensjon

Intervensjon er eit omgrep nytta for ulike behandlingar i menneskekroppen. Det dei har til felles er at ultralyd eller røntgen vert nytta som vegleiing, operatøren kan ikkje sjå operasjonsfeltet direkte. Det er ein skånsom, kateterbasert metode, der tilgong til det aktuelle området er gjennom eit tynt kateter/nål gjennom huda.

Denne metoden vert nytta til alt frå å stoppe blødningar ved coiling (hovud/mage), stentgraftinnlegging ved aneurismer i aorta (utposing på hovudpulsåra), til mindre inngrep som abscessdrenasjer, biopsi og innlegging av dren for avlastning av nyre- og gallesystemet.

Angiografi

Vi undersøker alle blodkar i kroppen med unntak av hjartet. Direkte omsett betyr angiografi "teikning av blodårer". Metoden er den mest nøyaktige for undersøking av blodårene i kroppen. Denne undersøkinga er også kateterbasert, og som regel vert det tynne kateteret lagt inn i hovudpulsåra via lysken. Kontrastmiddel vert sett inn gjennom kateteret i det aktuelle området. Slik får ein framstilt blodårene, som elles ikkje ville vore synlege på røntgen. Programvara i røntgenapparatet gjer det mogeleg å fjerne all anatomi, slik at kun blodåresystemet er synleg.

Pasientane er som oftast reia ut på førehand, og ei angiografiundersøking hjå oss endar ofte med behandling (intervensjon) som blokking, stenting eller coiling.