ERP
Eksponering med responsprevensjon (ERP)
Eksponering med responshindring (responsprevensjon) inneber gradvis å utsette deg for ubehagelege situasjonar og gjennom dette lære deg å tolerere angst og å endre reaksjonsmønsteret. Dette er ein godt dokumentert metode ved tvangsliding. Det er oppretta eigne behandlingsteam over heile landet.
Ei tvangsliding er vanemessige måtar å tenke, kjenne og opptre på som er ekstremt ubehagelege, bortkasta og vanskelege å bli kvitt på eiga hand. Ubehagelege og skremmande tankar, bilde eller impulsar dukkar stadig opp i bevisstheita utan at du ønsker det. Desse kjem ofte saman med opprivande kjensler og sterk trong til å gjere noko for å dempe ubehaget.
Nokon bruker da til tvangshandlingar for å prøve å kjenne seg betre. Dessverre verkar ikkje desse rituala i noka særleg grad, og ubehaget blir berre dempa mellombels. Snart legg ein så mykje tid og energi i rituala at andre delar av livet blir forstyrra.
Dei vanlegaste tvangshandlingane er overdriven vasking eller sjekking av dører, vindauge eller elektriske apparat. Andre har tvangshandlingar knytte til overdriven orden, symmetri eller gjentaking. Mange utfører også mentale ritual, som å telje til visse tal eller tenke på positive ord for å nøytralisere negative tankar.
Gjennom eksponering med responshindring kan dei fleste som er ramma av ei tvangsliding, oppleve stor betring.
Eksponering
Eksponering inneber at du konfronterer situasjonar som utløyser tvangstankar, og at du blir verande i situasjonen over ein lengre periode.
Responshindring
Responshindring inneber at du hindrar deg sjølv i å gjere noko for å bli kvitt tvangstankane og ubehaget knytt til dei. Du avstår frå ritual som du er vand til å gjere når du er plaga av ein tvangstanke.
Trening
Om du for eksempel har smittetvang, skal du trene på å ta på noko som du meiner er skittent og la være å vaske hendene etterpå. Eit anna eksempel kan vere å forlate huset og sjekke låsen berre éin gong (eksponering) utan å gå tilbake og sjekke igjen (responsprevensjon).
Angsten minkar etter tilstrekkeleg eksponering, så lenge du ikkje utfører tvangshandlingar. Du får erfaring med at du kan fungere uavhengig av angsten, og at angsten og ubehaget kan handterast utan ritual og at du prøver å halde deg unna ubehaget. Dessutan får du undersøkt kor gyldige tvangstankane er. Som med alle vanar blir tvangstankar og tvangshandlingar svakare gjennom regelmessig øving.
Før
Mål for treninga
Saman med behandlaren din får du på ein systematisk måte undersøkt kva som skjer med angsten og ubehaget om du ikkje gjer rituala dine, eller unngår situasjonar som utløyser trongen din til ritual. Behandlinga føreset eit godt samarbeid mellom deg og behandlaren din. De set opp mål for treninga saman.
Behandlinga
Behandlinga er utforma for å gjere symptoma dine så svake at dei ikkje lenger forstyrrar deg i dagleglivet. Som med alle vanar kan tvangstankar og tvangshandlingar bli svakare gjennom øving. For å gjere dei svakare øver du altså på to måtar: eksponering og responshindring.
Ein partnar eller familiemedlemmer kan om ønskeleg trekkast inn i behandlinga på eit tidleg tidspunkt. Når dei får informasjon om tvangslidinga og prinsippa for behandlinga, kan dei bidra med gode forslag til korleis treninga, spesielt i heimen, kan gjennomførast.
Etter
Det er viktig at du fortset å bruke det du har lært i behandling. Når behandlinga nærmar seg slutten, er det vanleg å snakke om korleis du kan redusere faren for tilbakefall.
Kontakt
Glasblokkene
Psykisk helsevern
Oppmøtestad
Divisjonsleiinga i Psykisk helsevern held til i Glasblokkene, Blokk 1, 5. etasje.
Glasblokkene
Haukelandsbakken 1
5021 Bergen