Kirurgisk avdeling - Voss

Som pasient hjå oss er du enten innlagt for ein planlagt operasjon eller som øyeblikkeleg hjelp. Planlagde operasjonar kan vere operasjonar i mage/tarm, fedmeoperasjon, brokkoperasjon, fjerning av galleblæreoperasjon, hofte – og kneprotesoperasjon, og ulike gynekologiske operasjonar. Nokre pasientar som er innlagt som øyeblikkeleg hjelp kan og få behov for eit kirurgisk inngrep. Det kan til dømes vere blindtarmbetennelse eller ulike brotskadar. Me tek hand om og klargjer pasientar i førekant av ein operasjon. Etter operasjon vert ein overvaka på Intensiv og kjem tilbake til avdelinga når ein ferdig overvaka.

 

Me er ei avdeling med stabilt personale, godt arbeidsmiljø og høg fagleg kompetanse. Her møter du sjukepleiarar, hjelpepleiarar/helsefagarbeidarar, legespesialistar og legar i ulik spesialisering. Me gir behandling og har kompetanse innanfor alle fagfelt nemnt ovanfor. Me har sjukepleiarar og hjelpepleiarar/ helsefagarbeidarar med vidareutdanning innanfor kreft og palliasjon, stomi (utlagt tarm), sår, smerte og gastro.  

 

Me har eit tverrfagleg samarbeid med andre postar, spesialavdelingar og støtteeiningar både ved Voss Sjukehus og Haukeland Universitetssjukehus.

Er du pasient på Bergen Legevakt eller Haukeland Universitetssjukehus og får påvist ein brotskade kan det vere du får behandling på Voss sjukehus. Me opererar pasientar med ulike brotskadar frå Bergen og kringliggjande kommunar. I hovudsak dreier det seg om lårhalsbrot, ankel brot og handleddsbrot.

Open retur er eit tilbod som hovudsakleg er til pasientar med kreftsjukdom som ikkje kan kurerast. Meininga er å skapa tryggleik både for deg som pasient og dei kring deg. Har du fått tilbod om denne ordninga vil det seie at du er velkommen til å ta direkte kontakt med oss på avdelinga. Ved behov vil du kunne bli direkte innlagt til avdelinga utan å måtte gå via akuttmottak. Me samarbeider med kommunen dersom du treng kommunal bistand etter utskriving frå sjukehuset.