Jobb på medisinsk overvakningseining

​MOE - post 6 er er organisert under Seksjon for Infeksjonssjukdommar, Medisinsk klinikk, Haukeland universitetssjukehus. Du finn oss i 7.etasje, nord i sentralblokka. Telefonnummeret til avdelinga er 55973720.

Vi har 10 sengeplassar fordelt på tre einerom, tre plassar på to luftsmitteisolat og eit overvakingsrom med fire sengeplassar. Alle romma har sluse, og fem rom kan bli brukt som isolat. 

Vi er bemanna for å kunne ivareta ein overvakingsfunksjon for kritisk dårleg pasientar, samt ein akuttfunksjon for mottak av meningitt (hjernehinnebetennelse) direkte på post. Vi jobbar ut frå primærsjukepleieprinsippet, men er flinke til å spørre om hjelp og støtte når situasjonen krev det. 

Vi har eit godt arbeidsmiljø og er ein god blanding av sjukepleiarar, helsefagarbeidarar og spesialsjukepleiarar, både kvinner og menn.

På posten møter du pasientar med ulike diagnoser frå 16 år og oppover.  Nokre har smittsame tilstandar som tuberkulose, clostridium, covid-19  eller MRSA og treng isolasjon på einerom over kortare eller lengre tid. 

Andre kan være akutt og kritisk sjuke med sepsis, hjernehinnebetennelse, alvorleg pneumoni, ketoacidose, alvorlege elektrolyttforstyrringar og liknande. Pasientane treng tett monitorering, respirasjonsstøtte og fastvakt/oppfølging.  Vi kan ha overvaking i alle sengene med monitorering, og støtter dei andre medisinske postene ved behov for tettare monitorering/overvakning.

Vi gir blant anna pressorbehandling og CPAP/BIPAP. Desse pasientane får ofte arteriekran, og vi kan analysere blodgassar i eige analyseapparat på eininga . Vi har og generell indremedisin som pneumoni, gastroenteritt, sårinfeksjonar og infeksjonar i urinvegar. 

Kvardagen vår består først og fremst av tett oppfølging av pasientane; pleie, medisinering, observasjonar, støtte til pasientar og pårørande. Vi arbeider tverrfagleg med fleire yrkesgruppar i sjukehuset. Her vil du møte nye utfordringar, problemstillingar og diagnoser, lære noko nytt kvar dag og utvikle deg fagleg.