Koordinator/ barnekoordinator og individuell plan (IP)

Barnekoordinator og koordinator

Retten til barnekoordinator og koordinator i kommunen kjem mellom anna fram av helse- og omsorgstjenestelova §7-2 og §7-2a, spesialisthelsetenestelova §2-5a og pasient- og brukerrettighetslova §2-5b og c. Ta kontakt med koordinerande eining i kommunen din om du har behov for koordinator eller barnekoordinator.

Familiar som har eller ventar barn med alvorleg sjukdom, skade eller nedsett funksjonsevne, og som vil ha behov for langvarige og samansette eller koordinerte helse- og omsorgstenester og andre velferdstenester har rett til barnekoordinator.

I denne rettleiaren frå Helsedirektoratet står det at barnekoordinator skal:

koordinere det samla tenestetilbodet 
ha oversikt over og bidra aktivt til å ivareta ansvaret til kommunen for nødvendig oppfølging og tilrettelegging for familien og barnet, i form av tilbod om eller yting av helse- og omsorgstenester og andre velferdstenester 
sørgje for at familien og barnet får nødvendig informasjon og heilskapleg rettleiing om
- helse- og omsorgstenestetilbodet
- andre velferdstenester
- relevante pasient- og brukarorganisasjonar
sørgje for at familien og barnet blir gitt rettleiing i kontakten med desse (over), og at det blir formidla kontakt eller tilvising vidare til slike tenester eller organisasjonar
framdrift i arbeidet med individuell plan

Kommunen skal tilby koordinator til pasientar og brukarar med behov for langvarige og koordinerte tenester etter helse- og omsorgstenestelova. Dette gjeld uavhengig av om pasienten eller brukaren ønskjer individuell plan.

Ein koordinator skal ifølgje forskrift om habilitering, rehabilitering og koordinator:

sørgje for nødvendig oppfølging av kvar enkelt pasient
sikre samordning av tenestetilbodet i samband med institusjonsopphald og overfor andre tenesteytarar
sikre framdrift i arbeidet med individuell plan

Du kan lese meir om koordinators arbeidsoppgåver i denne rettleiaren frå helsedirektoratet.

Det kom fram mykje praktisk informasjon om koordinatorrolla i innsiktsarbeidet i prosjektet Habilitering i Barn og unges helseteneste:

Søknad om koordinator burde bli sendt samtidig som tilvising til utgreiing
Koordinator er ei hjelpande hand som koplar på aktuelle tenester og dannar ansvarsgruppa
Koordinator skal sikre at alle rundt barnet/ungdommen samarbeider effektivt og at familien får den støtta dei treng
Koordinator må tidleg i prosessen ha eitt møte med foreldre og barn/ungdom, der koordinator:
- gir informasjon om IP som verktøy for koordinering
- kartlegg behov
- avklarer mål for næraste framtid
- gir familien rettleiing på kva dei har rett på
- gjer ei forventningsavklaring
Koordinator samlar involverte aktørar til ansvarsgruppemøte og koplar også på aktuelle nye tenester
- Møteinnkalling inkluderer målformulering frå møtet med foreldre og barnet/ungdommen

Individuell plan (IP)

Individuell plan (IP) er både eit dynamisk verktøy og ein strukturert samarbeidsprosess mellom tenesteytarar og -mottakar. Retten til IP kjem mellom anna fram av helse- og omsorgstenestelova §7-1, spesialisthelsetenestelova §2-5 og pasient- og brukarrettslova §2-5. Formål med og innhaldet i planen er beskrive i forskrift om individuell plan ved yting av velferdstenester.

I innsiktsarbeidet i prosjektet kjem det fram at IP er mykje brukt i habiliteringsoppfølginga. Fleire kommunar har digital IP kor involverte aktørar kan lese oppdatert IP og kommunisere med dei andre aktørane.

Lenker om koordinator og IP

Tilbake til Habilitering i Barn og unges helsetjeneste